يا والدي للشاعر فوزي غديٌرعمر

يا والدي لملقاك حنيت = تفكرتك وبكيت = وشبيك يا غالي مني جفيت
جفيت ما جيتش == وقداش من سنين ما طليتش
نسيتني ولا اشبيك ما لهيتش == واني نظن هم لفراق بيه رضيت
ومضنونك من البال ما ناسيكش ==وطالبك تزورني يا والدي للبيت .
تزورني نتهنى == هذاك هو مطلبي الي نتمنى
عامين والثالث يحول سنه == طال رجايا ومن الوحش فديت
وضجيت لغيابك وما قدرت نكنه == ذلتني سنين العمر وما عزيت .
ما لقيت عز وداعي == وما لقيت من يفك قياد كراعي
وليه يا زمن ضلعت ضلاعي == نوايب الشقا رغم الألم قديت
نوصيك خلي الصبر ليا راعي == وزولك يا والدي عن الدوم ما نسيت .
ما قدرت ننساك == كل لحظة من الوقت تفكرني بغلاك
يا قمر يا ضاوي يا مبهاك == في العلو شامخ وعالغير تعليت
وحتى جفيتني والله ما نجفاك == عقاب كل اسبوع قداك نويت .
قدا شورك في قبرك == نقعد عند راسك نتوحى خبرك
ثماش نتفكر ايام صغرك == ايام الشدة الي عليا فيها جريت
واني عارف المكتوب عالفراق جبرك == وصبحك في حفرة فيها تمديت .
تمديت محايد == خطيتني وسكنت اللحايد
ولو لا درك الحال خلفلي النكايد == ما كنت ندون ابيات شعري ولا خطيت
وتحرقت بنيران الفرقة فيا وقايد == ولا صبت خلاصي منها ولا طفيت .
تنهنه شوي وقال == يا مضنوني في الدنيا وش مازال
حتى من الوالدين اسقدو للمآل == وما عاد لي حب للعيش ولا تمنيت
نوصيك يا وليدي سمح لفعال == ما ينفعك في الآخرة كان وش كديت .
ما تنفعك كان الوصية == بيها تتحل قدامك ابواب الرضية
يا فوزي يا صغير الذرية == طيق الوجايع بش نقول عليك تهنيت
وما تنساش كل جمعة طل عليا == لجيانك يا غالي تلقاني استنيت .
نستناك تحدثني == تخفف عليا حمل الوحش وتريحني
وبالك يا وليدي ببكاك تجرحني == وماك تعرف كيفاش بعدك وليت
واللحد ما عاد حاب يسرحني == التالي راني عليك يا كبدي طليت ..
نطل عليك ونشوفك == نطبن عن احوالك وظروفك
يا لندرى وش حالتك مع زهوفك == واني نظن حتى الفرح بعدي ما بغيت
نوصيك بالك تصرم غزل صوفك == وما تكدر علي بماضي ورايا خليت .
ما تجبد ماضي تودر == الي حصدو سبوله وتندر
حسراه منين كنت راكب مهري يهدر == ندقدق الصخر وجوف لراضي حليت
واليوم يا روحي مكتوبي نزل مقدر == بحال لا عشت ولا يوم عالارض مشيت .
بحال لا عشت وضنيتك == وبحال لا ليلة لصدري ضميتك
وما تقول في مرقدك حطيتك == ولا يوم من الجميل تكسيت
لكن من زلال الأبوة راني سقيتك == وعلى الله بيت الحن في قلبك بنيت
بيت الحن بنيتها == وسمكت ارفافها وقديتها
ولولا أنات التعب أنيتها == بعد ربي ما كان يكتب وجودك ولا جيت
وتو هاك ابيات شعرك خطيتها == وخيار قولها يا وليدي عليا رديت .
خيار قولها نصغيله == كلام يعبر قوافيه جميلة
حنى اولاد غدير للشعر عدنا صيله == نقدو ارداعه وسمحه للغير هديت
وفي لخر بلغ سلامي لجميع الدويلة == وقوللهم رحيلي للآخرة شديت

الموضوع الأصلي : يا والدي للشاعر فوزي غديٌرعمر المصدر : منتدى تكنولوجيا العين الذهبية

faouzi ghedeir ; توقيع العضو