اشهر الجمل التي يقولها اهلنا في مصر

مفيش حد مننا مسمعش الجمل دى كلنا بنسمعها بطريقه مستمرة من امهاتنا لدرجة انكو تحسو انها من العادات والتقاليد :

* انتا مالك من ساعت ما دخلت البيت و انتا فرحان انتا جاي من انهي غرزة.

*ذاكر ياموكوس مش فالح غير فى الهيافه والكلام الفاضى.

* خلصي اكلك وناميلك شويه عشان تقومي تزكريلك شويه.

ذاكرلك ساعتنين بتركيز كأنك ذاكرت اليوم كلو (الغريب اما تقعد تذاكر سعتين يقولو و هي دي مذاكره)

يا ابني تعالي اقعد معانا ولا انت ماجر اوضه جوه البيت ......

ابقي نشف الحمام بعد ما تخرج منه.

يا خويا ياريتك حافظ الدروس اللى عندك زى ما انت حافظ الاغانى كده .

اعملى حسابك اول م الدراسه تيجى الرسيفر هيتشال هو والتليفزيون.

*قبل الفجر: ارجع بات في المكان اللي انت جاي منه.

* لو كانت اللي علي التليفون طنط سلوي قوليلها ماما نايمة .

* ابقى قابلني بكرة تاخد بالجزمة وتاكل كل حاجة غصب عنك.

يابنى حرام عليك هات قناة الناس الشياطين ماليه البيت.

* امشى جاتك مشش فى ركبك .

* جتها نيلة الى عايزة خلف تيجى تتفرج .

* متحطيش الموبيل جنبك و انت نايمه هيجبلك تخلف عقلي .

* متتأخرش وهات عيش وانت جاى .

* هو ده اللي انت فالح فيه طول الليل والنهار قاعد علي الزفت الكمبيوتر بتاعك لحد مهيجلك تخلف عقلي منه .

* كل يوم هات هات لمة ربيتلى الهتهات (الحاج طبعا) مع انى مش عارف اية الهتهات ده بس ماشية مع الجملة.

*ابقى ورينى مين حينفعك فى الاخر من شوية الصيع الى انت مشيلى وراهم .

* مش ملاحقه علي التليفون ولا الموبيل عملالي فيها الست المهمه.

*برة البيت بتضحكوا وجوة البيت لاوى لنا بوزك ............ خلي شوية اصحابك الصيع ينفعوك.

* كريم دا عيل بايظ وماتمشيش معاه تاني .

* مين منى دي انتى كل يوم تصاحبي واحدة جديدة ؟.

* هياا الوزيرة معندهاش وزاره النهارده قومى يا حبيبتى الساعه10 .

* قومي ساعدي امك ده اللي هيتجوزك أمه داعية عليه.

* انا سايبالكوا البيت وماشية ومش حتشوفوا وشي تاني .

* لمى هدومك انتى مش عايشة فى زريبة بكرة اشوف بيتك هيبقى ازاى خرابة طبعا.

* وانت فاكر احنا مستنيين منك حاجه .

* كفايه رغي في التليفونات .

* اطفي التلفزيون وقوم ذاكر ولا خش اوضتك .

* بلاش تمشى حافى البس شبشب وانته داخل الحمام .

*فلوسك بتروح فين يا هبله انتي بتصرفي على الصبيان؟؟.

*مع ان الواحد كل سنة بينجح و رغم كدة يقولولك ابقى تف على وشى لو نجحت

الايام اللى قبل الامتحانات : هو انت لسه هتبدا تذاكر اللى ذاكر ذاكر واللى نجح نجح (قمة الاحباط)

* ماتتأخرش علشان عندك كلية بكرة بدرى.

* انا : ياماما بقه ايه ده ؟؟؟
ماما:مووو لمـا يــــــخدك
او :مووو لما يشتح قلبك

* ادلعى ياهبة فى ايامك المهببه .

* هو انا الخدامه الى ابوكم جبهلكم .

* الى يطلع من الاوضه يطفى النور وراه .

*أبوك عندك أهو اتصرف معاه .

* يأبنى المذاكره مابتخلص .... نفسى اشوفك مره ماسك كتاب.

* اعمل حسابك مش حندخلك جامعه خاصه.

* قالب ليلك نهارك طول الليل صاحى وطول النهار نايم
طبعاً ما حضرتش ولا محاضرة ولا سكشن , وطول اليوم صايع بره البيت .

* احمد ربنا الاكل الى مش عجبك ده فى ناس مش لقينه .

* قومي سخني الأكل لأخوكي.

* ابوكم كان دايما بيطلع الاول على الفصل... " كل الابهات بيطلعو الاول
يعنى نفهم من كده ان اللى بيطلع الاخير مبيخلفش

كل يوم بعد الاكل :
انا مش الخدامه اللي اشترهاكوا ابوكوا اللي ياكل في طبق او يشرب في كباية يغسلها ما يركنهاش في الحوض.

انت راجع البيت متأخر و عاوز تتوه الموضوع وانت بتكلم مامتك

انت : ماما عاملة ايه مش عارف ليه حاسس انك وحشتيني يا ست الحبايب
مامتك : وحش اما يلهفك كنت فين يا صايع انت ؟ ايه اللى رجعك متأخر امبارح ؟؟

وطبعا نكن كل الاحترام للاهل وننتظر منهم دائما الجمل التقليدية الغير مفهومه واللى هم فاكرينها كلام عادى

انا مستني منكوا الردود علي الموضوع والشباب المصريين هيفهموني جدا

الموضوع الأصلي : اشهر الجمل التي يقولها اهلنا في مصر المصدر : منتدى تكنولوجيا العين الذهبية

عزي إيماني ; توقيع العضو