يوميات شاب غزاوي أثناء الحرب

بكل عفوية.. وبروح مرحة ... يروي الشاب الغزاوي كيف يقضي يومه خلال الحرب...
اترككم معه..!! هاد الشاب ساكن في حي تل الهوى (تل الاسلام كما سماه السيخ احمدياسين) غرب مدينة غزة

ويقول:

واجا اليوم العشرين..
وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..
كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..
مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ولو ضل معكم وقت.. إدعولي أصير غني..
نقلتها لتروا الصمود الغزاوي

الموضوع الأصلي : يوميات شاب غزاوي أثناء الحرب المصدر : منتدى تكنولوجيا العين الذهبية

عسقلان ; توقيع العضو

دسـتـــور و قـــانـــون الـمـنـتـــــدى - ادخل واقرا حتى لا يحذف موضوعك

لا إله إلا الله
لا حول ولا قوة إلا بالله

اللهم ارحم شهدائهم واشفي مرضاهم وداوي جرجاهم وانصرهم على عدوهم
انت القوي القادر على فك حصرهم

اللهم اقذف الرعب في قلوب عدوهم وزحزح الارض من تحت اقدامهم
اللهم ارنا في اسرائيل وكل اليهود يوما اسودا

اللهم حرر ارض فلسطين يارب العالمين

شكرا اختنا

كان الله في عونكم

احترامي

الموضوع الأصلي : يوميات شاب غزاوي أثناء الحرب المصدر : منتدى تكنولوجيا العين الذهبية

أمجد ; توقيع العضو

دسـتـــور و قـــانـــون الـمـنـتـــــدى - ادخل واقرا حتى لا يحذف موضوعك

هلأ بدي احكي عن يومياتي انا في الحرب
كان يوم السبت عنا تعويض في المعمل ومعملنا الدور السادس في الكلية
من الساعة9-12 الساعة 11 اعتقد سمعنا ئصف في كل الاماكن والشظايا في كل مكان
ومن حسن حظنا تجمع الجامعات عنا في قلب تجمع المقرات الامنية ومتل مابتعرفوا انه اول ضربة كانت للكل المقرات وفي نفسص اللحظة كانت 60 طيارة بتضرب الضرب كان مفاجئ لانا ماسمعنا ولا شفنا طيارات في السما
هلأ انا من جامعة الازهر وجنبنا الاسلامية الحيط بتاعتنا مشتركة معهم وجامعتي فتحاوية والاسلامية حمساوية
فصاروا زمايلي اكييييييد التافهين يتمسخروا انه عندهم الحمساوية بيجوا يتخبوا عنا حتى الطيارات ماتضربهم
بعدها نزلت لحتى اروح كل الامة في الشارع وكل مانمشي الشرطة تحكي ممنوع هاد الشارع خطر
فحكيت لصاحبتي يلا بنورح ناكل شاورما من الشيخ وهاد الذ شاورما في غزة فحكينا حنروح على الساحة(ميدان فلسطين) لانه مافي هناك الا سوء شعبي وكلها محلات لشو يئصفوها لما ركبت السيارة السواء بحكيلنا في 200 شهيد ومئات الاصابات
فانا حكيت في عئلي يئطع شرهم الناس شو بكذبو وبطلعوا اشاعات طلعت على الناس كلهم بركضوا على الجامعات يجيبوا اولادهم
وواحد طالع بالبجامة وواحد تاني حافي فصرت اضحك هو ابن الجامعة زغير بدو مين يروحوا
المهم روحنا الساحة في يمكن الف محل كلهم ئاع7دين بئفلوا محلاتهم وكلهم فاتحين على الاذاعات
حكيت اكيد في شي كبير في البلد وهلأ بدي اروح على البيت طبعا مااكلت شاورما
والاحلى انه كمان مافي سيارات فروحت مشي مع صحباتي المسافة تئريبا ساعة مشي
وانا المرشدة لانهم اول مرة يروحوا مشي مشينا بشارع يافا هاد شارع كله ورش حدادة فحكيت يعني امان مافي شي ينضرب
لهما ضربوا صاروخ بينا وبينه مترين كان على مسجد اعتقد مسجد المحطة وعلى طول الشارع صار مغلق للدواعي امنية
والمشكلة جوالي من اول ضربة عطل لحتى اهلي يخافوا عليا منيح المهم
لفينا من شارع تاني لهما ضربوا بصاروخ اجا شاب الله يجزي الخير شايفنا بنمشي وموعارفين وين نروح
وصلنا بسيارته للمنطئة بنعرفها وكملنا مشي ووصلت البيت اول مافتحت البيت ووووووووينك فكرناكي استشهدي
طلعوا المساكين من اول ضرب عطل التليفون الارضي والجوال والنت والكهربا ئطعت وبعدها عرفت
انه هاي حرب هههههههههههه
ومن حسن حظنا انه ئصف الدبابات والطيارات والزوارق بوصلنا
لأنا منطئة حدودية وعالية
هاد اول يوم وبائي الايام بتشبه ايام الشاب بس هوكان عنده تليفون الله واعلم كيف شبكتهم فلتت من الصاروخ
على فكرة الزنانة هي طيارة الاستطلاع ومن كتر القصف بطلنا نجمع في اي اتجاه لانه كله بيضرب
وبعدين نحنا خبرة اول مانسمع صوت بنعرف هاد من البر ولا البحر ولا الجو وشو نوعه كمان
واول ماتيجي طيارة اف 16 نعد 123 ترمي الصاروخ هههه شطارة ولامرة غلطت 3 يكون الصاروخ وائع وائع
وللامانة كانت ايام حلوة كل ناس ئلبها على بعض والي بيته بينهدم بروح على الجيران والاصحاب
في ناس اخدت اربع عائلات في بيتها والناس صارت ئريبة من ربنا والي يستشهد عنده حد بيحكي الحمدلله
ورغم انه لا اكل ولاميا ولاكهربا ولااي شي الناس صمدت طووووووول هالحرب
والله المستعان

الموضوع الأصلي : يوميات شاب غزاوي أثناء الحرب المصدر : منتدى تكنولوجيا العين الذهبية

عسقلان ; توقيع العضو

دسـتـــور و قـــانـــون الـمـنـتـــــدى - ادخل واقرا حتى لا يحذف موضوعك

الله الله على الروح الجميلة لاهنا في غزة

و الله يحسب كل شيء في موازين حسناتكمـ

الموضوع الأصلي : يوميات شاب غزاوي أثناء الحرب المصدر : منتدى تكنولوجيا العين الذهبية

عزي إيماني ; توقيع العضو

دسـتـــور و قـــانـــون الـمـنـتـــــدى - ادخل واقرا حتى لا يحذف موضوعك